تماضر أم المظاهر

أنا تماضر

متخرجة من سنة 2013 ومعي ماجستيرفي العربي وعاطلة ، ماخليت باب ماطقيته

درست بمدارس أهلية سنتين ماتحملت لا الإدارة ولا الطالبات، كونك بمدرسة أهلية يعني أنتي مدرسة وإدارية ومشرفة نشاط وأخصائية نفسية بنفس الوقت وعشيقة بعد اصبروا يجيكم العلم ….. ما أدري أحكي عن المناهج وإلا الحصص وإلا أدب الطالبات وأخلاقهم .

يادوب راتبي يكفي السواق ولا هوب سواقي بعد قطية مع بنت جيرانا اللئيمة يعني لاف لاف للبيت مجاملة قلت بدفع 800 قالت ايه مو مشكلة !! والحلا اللي علي مرة بالأسبوع جعلهم مايحدرونه وقطية كل من تزوجت وإلا حملت وإلا انخطبت لا وهابين بعيد الميلاد يعني 14 وحدة 14 هدية و14 قطية كل سنة مدري هالثلاث آلاف تكفي وشو وإلا وشو

كل شغلي أهوجس شلون ينزلوني لابتدائي على الأقل مافيه إعراب مافيه مكايد ومداحر عيال العوايل الكريهة وهم يقولون خططي لنا الإعراب ..( إلا وين الأيقونات حسيت إني مدرسة عربي جادة صدق ؟)

حامت كبدي وقالت لي وحدة دقي على مالك المدارس تراه حليل وحاولي معه ماخلاني أداوم بالأسبوع الميت يوم درى إني حامل فأكيد بيتعاون معك وينزلك ابتدائي وآخذ الرقم منها ويهلي ويمرحب ويوعدني خير وينزل جدولي ابتدائي على نهاية الفصل الدراسي الأول

والرجال ماصدق خبر نشب نشبة بالواتساب الصبح يرسل صباح الخير وبطاقات الأولين والجمعة جمعة مباركة شوي شوي يرسل أغاني يتدرج والعياذ بالله في الرذيلة هههههههههههههههههههه ثم خربها وقال بخطبك بس بتعرف عليك هالسنة وعرفت نيته وسحبت عليه واخر السنة أنهوا عقدي وكالعادة هذي نهاية كل وحدة شريفة

وكلت تبن ويازين الثلاثة اللي طارت ولو إنها منتفة من كل جهة

وأقولب براسي وين أروح ووش أسوي

الإعلانات

أنا تاااااء

مرحبًا أنا تاء

أحيانًا أكون مربوطة وأحيانًا مبسوطة،

أظهر بأقنعة كثيرة

سأضحكك مرات وأغضبكِ مرات أخرى ستراني نسوية متمردة ومرة حرمة في جلسات الضحوية، ومرة مراهقة تتسكع في الرياض بارك 🙂
جديدة في عالم التدوين

إذا شفت أخطاء تقنية لاتتحمس ترى ماعندي وقت أتعلم

ونبدأ بسم الله

صفوا واسمعوا